O xurado do Premio Aresa de Desenvolvemento Rural seleccionou un total de sete proxectos entre todos os presentados á XIV edición do certame, os cales competirán polo galardón, que se dará a coñecer o vindeiro 30 de decembro.

Nunha primeira fase o xurado fixo unha preselección entre os presentados e entre os que se atopa o proxecto “Life Viñas Atlánticas”.

A contía do premio, de 10.000 euros, converte esta convocatoria nunha das máis relevantes do sector. Ademais, este ano ofreceráselle á empresa gañadora a posibilidade de solicitar asesoramento e axuda para o desenvolvemento do proxecto.

Demostrar a necesidade e a viabilidade da produción sustentable de viño na Denominación de Orixe Rías Baixas, logrando minimizar o uso de produtos químicos nunha zona de clima atlántico que favorece a proliferación de varios tipos de fungos. Este é o obxectivo do proxecto “Life Viñas Atlánticas”, que onte foi protagonista dunha xornada promovida pola institución provincial.

A Deputación de Pontevedra solicitará financiamento do programa “Life” da Unión Europea para pór en marcha unha segunda fase do proxecto “Viñas Atlánticas”, co obxectivo de estendelo a toda a provincia e darlle servizo a todos os produtores das cinco subzonas da D. O. Rías Baixas. A primeira, por agora, só se desenvolveu na do Salnés, mais foi todo un éxito. Os 450 viticultores que utilizaron este sistema de predición do risco de enfermidades da uva lograron reducir o uso de fitosanitarios entre un 15 e un 20% na campaña de 2012 e espérase que na deste ano a cifra se supere sensiblemente.