A súa costa é baixa e areosa, de praias tranquilas e recollidas, relacionadas na súa maior parte con complexos dunares de gran desenvolvemento como os da Lanzada.

Ábrense tamén extensas enseadas na desembocadura do Umia ou en Vilagarcía de Arousa, o que, pola súa condición de abrigo, favorece a localización de varios portos.

Outra peculiaridade da paisaxe é a presenza de numerosos illotes e illas como a de Arousa ou A Toxa, así como a península do Grove, que constitúe un magnífico exemplo de tómbolo, formado neste caso polo extenso areal da Lanzada.

O clima, o relevo litoral e a fertilidade das súas terras, entre outros moitos factores, converteron O Salnés nunha comarca rica e próspera baseada no aproveitamento dos recursos endóxenos, o que se traduce nunha economía diversificada, cunha dinámica demográfica de crecemento positivo e unha elevada densidade de poboación.

As importantes actividades pesqueira, industrial e turística constitúen os piares da súa economía, ás que hai que engadirlles a súa riqueza agrícola, cuxo máximo expoñente é o cultivo da vide, da que se elabora o prestixioso e afamado viño Albariño, baixo a Denominación de Orixe Rías Baixas.